РАБОТИЛНИЦА - „САМОПОЧИТ И БЕЗУСЛОВНО ПРИФАЌАЊЕ НА СЕБЕСИ, ДРУГИТЕ И СВЕТОТ“, ДЕНОВИ НА ПСИХОЛОГИЈА 2022

14.12.2022

На 14.12.2022 година, м-р Атанас Иваноски, лиценциран психолог и РЕ&КБТ психотерапевт во едукација и под супервизија од ЗПСПЕ „Когитацио Рационалис“ Кавадарци, реализираше работилница со наслов „Самопочит и безусловно прифаќање на себеси, другите и светот“. Работилницата е релизирана како дел од настанот „Денови на психологија 2022“ кој се организира седма година по ред, а овогодинешниот слоган гласеше „Да не го игнорираме слонот во собата“. Настанот е во организација на Комора на психолози.

Самопочитта е концепт кој го учи човекот да се прифаќа или вреднува себеси само кога се однесува добро или истакнал некои позитивни особини, како и да го оценува своето ЈАС со една оценка. За разлика од неа, безусловното прифаќање на себеси го учи човекот дека е премногу комплексен и дека неговите поведенија и особини не можат да ја дефинираат човековата вредност.
 

Работилницата имаше дидактички и практичен дел во кој беа вклучени неколку вежби. Учесниците имаа можност да се запознаат со природата на концепот на самопочит која е условена и води до емоционални проблеми, како и со предностите од усвојувањето на безусловното прифаќање на себеси, другите и светот како дел од рационалната и прагматична животна филозофија.